Бүген Наил Мәһдиев онлайн-форматта эшмәкәрләр белән очрашу үткәрде. Шәһәр башлыгы кече һәм урта бизнес вәкилләре белән коронавирус пандемиясе нәтиҗәсендә катлаулы икътисадый ситуациягә бәйле актуаль проблемалар турында фикер алышты. Чарада шулай ук Башкарма комитет җитәкчесе Фәрит Салахов, Башкарма комитет җитәкчесе урынбасарлары Наталия Кропотова һәм Ирина Сәгыйдуллина катнашты.
Видеоконференциядә 19 кеше катнашты. Видеоэлемтә буенча «Домкор» төзелеш компаниясе генераль директоры Мөнир Гайнуллов, «Торговый квартал» сәүдә үзәге идарәчесе Алексей Аринин, «Мастер» КИП генераль директоры Фәрит Закиров, «Планета Фитнес» директоры Эдуард Жестков һ.б. сораулар белән мөрәҗәгать иттеләр.
«Океан» сәүдә фирмасы директоры Светлана Зайцева җәмәгать туклануы өлкәсендә бизнес кичерә торган кыенлыклар турында сөйләде: «Безнең тармак шәһәрдәге икътисадый торышка, кешеләрнең тормыш-көнкүрешенә бәйле. Безгә апрель, май, бәлки июнь аена кадәр түзәргә туры килер. Хезмәткәрләргә хезмәт хакын түләргә кирәк. Акча каян алырга? Эш бирүчеләрнең куркынычсызлык мендәре юк диярлек. Банклар ярдәм итсен һәм бездә өч айга, ярты елга кредит каникуллары булсын иде», – дип борчылуын белдерде җитәкче.
Шулай ук эшмәкәр үзе дә биналарны арендага бирә: «Арендаторлардан ничек акча алырга? Минемчә, бу дөрес түгел! Алар эшләми бит. Берәү дә зыян күрмәсен дип сорар идем. Без аренда түләүләрен алмыйбыз, әмма безгә дә милеккә салым буенча каникуллар бирелсен иде», – дип өстәде Светлана Зайцева.
«Мастер» КИП та үз резидентлары өчен аренда түләү буенча кичектерү тәкъдим итәргә тели. Бүген индустриаль парк предприятиеләре читтән торып эш режимына күчтеләр.
«Без икътисад министры адресына, республика сәүдә сәнәгать палатасына 2009 ел тәҗрибәсен кабатлау тәкъдиме белән мөрәҗәгать иттек инде, ул чакта ТР финанс кризисы вакытында "Мастер" КИПка агымдагы эшчәнлекне тормышка ашыру, коммуналь түләүләр өчен ташламалы финанслау бүлеп бирде, моңа җавап итеп без резидентларыбыз өчен аренда түләвен кичектереп тору мөмкинлеге тудырдык. Ул чакта бу чара эшләде, резидентлар ярдәмнән файдаланды. Сездән, Наил Гамбәрович, безнең мондый тәкъдимне хуплавыгызны үтенәм. Бу идея тулы бер мәсьәләләрне хәл итәчәк», – дип уртаклашты Мастер КИП генераль директоры Фәрит Закиров.
Милеккә һәм җир салымын кичектереп тору үтенече белән мэрга «Торговый квартал» сәүдә үзәге идарәчесе Алексей Аринин мөрәҗәгать итте. Бүген сәүдә үзәге бинасында «Перекресток» супермаркеты һәм даруханә генә эшли.
Мондый хәл эшсезлек дәрәҗәсен арттыруга китерергә мөмкин. "Россия эше" кадрлар үзәге директоры Татьяна Быданова да элемтәдә иде. Ул билгеләп үткәнчә, әлегә эшсезләр санының артуы күзәтелми. Шулай итеп, соңгы өч көндә элек беркая да эшләмәгән эшсезләр саны арткан. Бу 62 кеше. Хәзерге вакытта үзәк шәһәр оешмалары җитәкчеләреннән хезмәткәрләрне яңадан укытуга һәм җәмәгать эшләрен оештыруга булган ихтыяҗлар турында мәгълүмат җыя.
«Планета Фитнес» фитнес-клубы генераль директоры Эдуард Жестков клубның онлайн форматындагы эше турында сөйләде. Әмма игътибар үзәгендә-коммуналь түләүләр буенча бурычлар булды. Ул шулай ук ярдәм күрсәтүне һәм ташламалы кредит бирүгә ярдәм итүне сорады.
Онлайн-очрашу барышында килгән борчулы сораулар арасында үз-үзеңне изоляцияләү чорында хезмәткәрләр һәм дежур персоналның шәһәр буйлап йөрүе дә бар иде.
Сәгать ярымлык киңәшмәне тәмамлап, мэр Наил Мәһдиев: "Без шәһәр бюджетының 30%ы кече һәм урта бизнес предприятиеләрен формалаштыра, дип горурланып әйтәбез. Без бер шәһәрдә яшәвебез һәм эшләвебез белән бердәм. Бүген яңгыраган мәсьәләләр белән ныклап шөгыльләнәчәкбез. Безнең бурыч-кешеләрне, коллективларны саклап калу. Кризис тәмамланачак - безгә барыбызга да яшәргә, эшләргә кирәк. Сез федераль ярдәм программаларын эшләтеп җибәргәндә, аларда катнашырга, шунда ук гариза тапшырыга әзер торырга тиеш. Без мәсьәләләр буенча фикер алышачакбыз һәм ресурсларны саклау компанияләренә, банкларга, республика җитәкчелегенә мөрәҗәгать итәчәкбез. Тагын бер кат үзегезне, якыннарыгызны һәм коллективыгызны саклау өчен чаралар күрүегезне сорыйм. Беренче чиратта, бер-береңне сакларга кирәк", - диде мэр.
Очрашуны тәмамлап, Наил Мәһдиев мондый онлайн-конференцияләр атнага ике-өч тапкыр узачагын хәбәр итте.
При использовании информации просьба ссылаться на Управление информационной политики и по связям с общественностью.
Җомга, 3 апрель 2020, 18:34