Бүген Яр Чаллыда Беренче майга багышланган бәйрәм чаралары уза. Азатлык мәйданында концерт оештырылды. Чаллылыларны шәһәр мэры Наил Мәһдиев котлады. Ул төрле өлкә һәм тармак коллективларына хезмәтләре өчен рәхмәтен белдерде.
«Яр Чаллы шәһәренең Беренче Май белән тарихы үзенчәлекле, - дип билгеләп үтте шәһәр мэры.- Советлар Союзының соңгы проекты – ярты гасыр элек төзелгән иң зур автомобиль заводы һәм шәһәр – тормышка ашырылды. Без "КАМАЗ"ның да, шәһәрнең дә яшәвен һәм эшләвен күрәбез. Яр Чаллы – сәнәгать шәһәре, монда эре стратегик предприятие, төзелеш индустриясе, транспорт, туклану предприятиеләре тупланган. Нинди генә авырлыклар булмасын, без яшәрбез, эшләрбез, очрашырбыз».
Наил Мәһдиев барлык катнашучыларны 6 майда узачак Валерий Гергиев җитәкчелегендәге Мариин театры симфоник оркестрының зур концертына чакырды. Мэр шулай ук 9 май көнне көндезге форматта "Үлемсез полк" акциясе узачагын билгеләп үтте.
Яр Чаллыда бәйрәм чаралары шәһәрнең өч районында уза, чаралар афишасын монда карарга мөмкин.
При использовании информации просьба ссылаться на Управление информационной политики и по связям с общественностью.
Якшәмбе, 1 май 2022, 11:58