Татарстанның аз керемле гражданнарына йортларны бушлай газлаштыралар

Россия Федерациясе Дәүләт Думасы депутаты, Дәүләт Думасының кече һәм урта эшмәкәрлек комитеты рәисенең беренче урынбасары Әлфия Когогина Татарстан Республикасында федераль программаларны гамәлгә ашыру буенча эшче төркемнең чираттагы утырышын үткәрде. Көн тәртибендәге төп мәсьәлә – күп балалы гаиләләр арасында социаль газлаштыру программасын гамәлгә ашыру.

«Минем коллегам, Дәүләт Думасы депутаты Татьяна Ларионова, ТР Сәнәгать һәм сәүдә министрлыгы, «Газпром трансгаз Казанҗ» ҖЧҖ, ТР Хезмәт, халыкны эш белән тәэмин итү һәм социаль яклау министрлыгы җитәкчелеге, муниципалитетлар һәм иҗтимагый оешмалар вәкилләре катнашында агымдагы эш нәтиҗәләре турында фикер алыштык. Татарстанда гариза бирү кампаниясенең нәтиҗәләре бүген начар түгел: 13 мең гариза бирелгән (шуларның 8,8 меңе кабул ителгән), 5,5 мең килешү төзелгән, 1,9 мең участокка газ кертелгән, 442 объектка тоташтыру башкарылган», - дип хәбәр итте Әлфия Когогина.

«Шуның белән бергә, республикада күп балалы гаиләләргә, Бөек Ватан сугышы ветераннарына, I һәм II төркем инвалидларына, инвалид балалары булган гаиләләргә, аз керемле гражданнарга газ бирүгә субсидияләр бирү эше дә зур темплар белән бармый. Апрель уртасына гражданнардан нибары 21 гариза килгән, шулардан 1,3 млн сумлык 17 гариза үтәлгән. Ни өчен шулай аз? Акча бар, ә теләүчеләр юк? Сәбәпләрен анализларга кирәк. Бу максатларга республика барлыгы 195 млн сум акча юнәлтә, 2,5 мең гаиләгә ярдәм итәргә планлаштыра.

ТР Хезмәт, халыкны эш белән тәэмин итү һәм социаль яклау министрлыгына, Сәнәгать һәм сәүдә министрлыгына муниципалитетлар белән тыгыз хезмәттәшлектә гражданнарга мәгълүмат бирү, нинди дә булса сәбәпләр аркасында аларга адресланган ярдәм чаралары ала алмаган татарстанлыларның проблемаларын өйрәнү буенча активрак эшләргә кирәк дип уйлыйм. Муниципалитет башлыклары барлык проблемаларга да җентекле анализ ясаячаклар һәм киләсе очрашуда май аенда нәтиҗәләр турында сөйләячәкләр», – дип билгеләп үтте парламентарий.