Яр Чаллының «ЗаряД» заводы шлемнар, тимераяклар һәм sup-бордлар чыгарырга планлаштыра

Яр Чаллының «ЗаряД» компаниясе санкцияләр шартларында хоккей кәшәкәләре җитештерүе буенча җитештерүчәнлеген арттыра. Җитештерү мәйданчыгында Башкарма комитет җитәкчесе урынбасары Наталия Кропотова булды.

«ЗаряД» компаниясе генераль директоры Артур Константинов кәшәкәләр җитештерүнең тулы циклы белән таныштырды.

Кәшәкәләр углерод җепселеннән ясала, аны «Алабуга-Волокно» предприятиесендә җитештерәләр. Шулай ук углерод җепселләрен UMAREX Росатом Дәүләт Корпорациясе компаниясе тәэмин итә.

Препреглардан кәшәкә ясау өчен аны кисәләр һәм ябештерәләр.

Аннары материалны кирәкле озынлыктагы детальләргә һәм крюк детальләренә кисәләр. Кәшәкәне формалаштыралар.

Әлеге формалар 150 градуслы пресс астына урнаштырыла. Шулай итеп кәшәкәләрнең тышкы өслеге һәм формасы барлыкка килә. Пресстан чыкканнан соң кәшәкәләрне инде әзер диярлек була.

Аннары аларны шлифалап, буяуга һәм лаклауга әзерлиләр.

Шулай ук, кәшәкәдә индивидуаль графика яки уенчыфамилиясе дә барлыкка килергә мөмкин. Теләгән һәр кеше үз фамилиясе белән кәшәкәгә заказ бирә ала.

«Безнең кәшәкәләр белән ил Президенты Владимир Владимирович Путин уйный», – дип горурланып билгеләп үтте Артур Константинов.

Профессиональ уенчылар өчен кәшәкәләрне индивидуаль рәвештә ясыйлар. Мәсәлән, капкачының кәшәкәсе башка уенчыларныкыннан бераз аерыла.

Билгеләп үтик, «ЗаряД» – «Яр Чаллы» Алгарышлы социаль-икътисадый үсеш территориясенең резиденты булган беренче компанияләрнең берсе. «ЗаряД» хоккей кәшәкәләре җитештерү 2016 елда оештырылган.  

Завод 40 кеше белән эшли башлаган, бүген биредә 149 хезмәткәр эшли.

Компания директоры сүзләренә караганда, быел тагын 14 эш урыны планлаштырылган. Бу яңа планнарны тормышка ашыру белән бәйле.

Якын арада компания спорт инвентаре чыгара башларга һәм композит материаллардан җитештерү тармагында лидер булырга ниятли.

«Бу елда без экипировкадан башларга ниятлибез, алга таба шлемнар һәм тимераяклар. Гомумән алганда, без «ЗаряД» компаниясен композит материаллардан продуктлар җитештерергә мөмкин булган җитештерү мәйданчыгы буларак карыйбыз. Без үз линейкабызны гади технологик карарлар өстәү хисабына киңәйтергә һәм яңа продукт җитештерергә планлаштырабыз. Без туризм өчен арбалетлар, sup-бордлар ясый алабыз», - диде Артур Константинов.