Чаллы Бөек Ватан сугышы ветераннары юбилей уңаеннан котлаулар кабул итә

Бөек Ватан сугышы ветераннарын Александра Васильевна Лазарева, Минзифа Гайфулла кызы Фәхриева РФ президенты Владимир Путин, шәһәр мэры Наил Мәһдиев, Үзәк районы администрациясе башлыгы Искәндәр Галимов исеменнән юбилей белән котладылар. Котлауларга шәһәр Советы депутаты Эдуард Фәттахов, шулай ук ТИҮ рәисләре Светлана Гурлева, Владимир Цоун да кушылды.

Түбән Новгород өлкәсендә туган Лазарева Александра Васильевнага 95 яшь тулды. Бөек Ватан сугышы елларында ул госпитальдә шәфкать туташы булып эшли, Ленинградтан эвакуацияләнгән кешеләрне кабул итә. 1948 елда кияүгә чыга һәм Казахстан Республикасының Джамбул шәһәренә күчеп килә, анда пенсиягә чыкканчы хастаханәдә шәфкать туташы булып эшли. 1989 елда Яр Чаллы шәһәренә килеп төпләнә. Александра Васильевна 3 бала тәрбияләп үстергән, 6 оныгы һәм 4 оныкчыгы бар. «1941-1945 еллардагы Бөек Ватан сугышында фидакарь хезмәт өчен» медале, юбилей даталарына медальләр белән бүләкләнгән.

Ленинград шәһәрендә туган Минзифа Гайфулла кызы Фәхриевага 90 яшь тулды. Минзифа Гайфулла кызы сеңлесен һәм әнисен генә хәтерли, әтисе үз теләге белән 1943 елда фронтка китә һәм хәбәрсез югала. Сугыштан соң ул озак вакытлар Ленинградта яши, санэпидемстанция каршындагы дезинфекция отрядында эшли. Аннан Таҗикстанга күчеп, кияүгә чыгып өч бала тәрбияләп үстерә. 2010 елда Яр Чаллыга күчеп килә. "Блокадалы Ленинградта яшәүче" билгесе, юбилей даталарына медальләр белән бүләкләнгән.